ગયા વીકએન્ડમાં મૂવી “જન્નત” જોયું જેમાં સિરીયલ કીસર “ઇમરાન હાશમી” મુખ્ય ભૂમિકામાં છે. આમ તો ઇમરાનભાઇનું “મર્ડર” સિવાય કોઇ પણ મૂવી જોયું નથી મેં પણ “જન્નત” નો રિવ્યુ સારો હતો એટલે થયું કે ચલો ટાઇમપાસ કરવા મૂવી જોઇએ. આ મૂવી જોયા પછી મને પણ આ મૂવી ઠીક લાગ્યું. એક વખત જોઇ શકાય એવું મૂવી તો છે જન્નત. વાર્તા ક્રિકેટની રમતમાં ચાલતી બેટીંગ અને મેચ ફિક્સિંગની આસપાસ છે. ગયા વિશ્વકપ દરમ્યાન બોબ વુલ્મરની હત્યાને પણ સાંકળવાનો આ મૂવીમાં પ્રયત્ન થયો છે. મહેશ ભટ્ટનું પ્રોડક્શન હાઉસ કોઇ ને કોઇ હોટ ઇસ્યુ પોતાની ફિલ્મોમાં વણી લેવાનું ચૂકતા નથી.

આ મૂવી જોઇને મને 1996 ના ક્રિકેટના વિશ્વ કપના દિવસો યાદ આવી ગયા. એ દિવસોમાં અમારા મિત્રવર્તુળોમાં જ સટ્ટાબજાર ખૂબ ગરમ હતું. 50 થી માંડીને 500 રૂપિયા સુધીનો સટ્ટો બધાં રમતા હતા. ડે નાઇટ મેચો હોવાથી બધાં ઇનિંગ્સ બ્રેક વચ્ચે કોઇ ખાસ જગ્યાએ ભેગા થાય અને નવા સોદા પાડે અને ભાવ બહાર પાડે. મેં આ બધું પહેલી વાર જોયું પણ એ નાના સટ્ટાબજારનું માહોલ પણ કાંઇ ઓછું ગરમ નહોતું. આ મૂવી બાદ એ બધું નજર સમક્ષ આવી ગયું ફરીથી.

દુનિયામાં સૌથી ખરાબ નશો પૈસાનો છે અને જો પૈસા વગર મહેનતે મળતા હોય તો પછી બીજું શું જોઇએ માણસને. બસ આ જ વસ્તુ આ ચલચિત્રમાં બતાવાઇ છે. લોકો ક્રિકેટના સટ્ટામાં લાખો રૂપિયા બનાવે છે અને ગુમાવે પણ છે. પણ મહેનત વગરના પૈસા હંમેશા માણસને પતન તરફ દોરી જાય છે. સટ્ટામાં કેટલાય લોકોએ પોતાના ઘરબહાર અને જીંદગી ગુમાવ્યા છે તો પણ હાર્યો જુગારી બમણું રમે એ ન્યાયે માણસ વધુ ને વધુ આ દલ દલમાં ખૂંપાતો જાય છે.

શેરબજારનો સટ્ટો આજે લગભગ દરેક ઘરમાં ઘર કરી ગયો છે. દરેક ઘરમાં કોઇક ને કોઇક શેરબજારમાં રમવાવાળું હોય જ છે. આનાથી હું કે મારુ ઘર પણ બાકાત નથી. આજથી 6 મહીના પહેલા તેજીમાં જમાનામાં લોકો ખૂબ કમાયા. એ વખતે પબ્લિક ઇસ્યુમાં લોકો (એમાં હું પણ ખરો) ખૂબ કમાયા. ઘણા ઇસ્યુમાં તો લિસ્ટીંગના દિવસે જ લોકોએ પૈસા ડબલ કરી લીધા. આમ ખાલી 25 દિવસમાં પૈસા ડબલ થતા જોઇને જે માણસ બજારનો સટ્ટો ના રમતો હોય એ પણ રમવા માંડે. જે ખરા ટાઇમે ઘૂસ્યા હતા બજારમાં એમણે તો પૈસા બનાવી લીધા પણ નવા સવા ઘૂસેલા લોકોની તો રિલાયન્સ પાવરના ઇસ્યુમાં બરાબરની લેવાઇ ગઇ.

છેલ્લે એક જ વસ્તુ કહી શકાય કે સટ્ટો રમવો હોય તો રમો પણ ધ્યાનથી.

વિન્ડોઝ મોબાઇલ લીધા પછી આજકાલ લેપ્ટોપ કરતા મોબાઇલ સાથે વધારે રમું છું. વિન્ડોઝ મોબાઇલ હોવાથી એને કંઇક ને કંઇક સળી કરવાની મઝા આવે છે. જો કે સૌથી સારી વાત એ છે કે હવે હું મોબાઇલથી જ ઘરના વાયરલેસ બ્રોડબેન્ડ નેટવર્ક સાથે કનેક્ટ કરીને ઇન્ટરનેટ સાથે કનેક્ટ કરી શકું છું. એનો ફાયદો એ છે કે નાના નાના કામો કે મેઇલ ચેક કરવા માટે લેપ્ટોપ લઇને નથી બેસવું પડતું.

ગઇકાલે મેપકિંગ install કર્યું આનાથી સિંગાપોરના કોઇપણ એરિયાના મેપ હું હવે મારા ફોન પર જોઇ શકું છું એ પણ GPS સાથે કનેક્ટ થયા વગર. હજી આ એપ્લિકેશનમાં પણ ઘણું જાણવાનું બાકી છે.

એ પણ કાલે ખબર પડી કે હજુ Windows vista OS સાથે ActiveSync કામ નથી કરતું અને synchronize  કરવા માટે windows mobile device centreનો ઉપયોગ કરવો પડે છે. હજી GPS વિશે વધુ જાણવાનું છે.  GPS ટેકનોલોજીનો પૈસા ખર્ચ્યા વગર કઇ રીતે વધુમાં વધુ ઉપયોગ કરી શકાય એ વિશે જાણવું છે. હજી પણ JAVA enabled applications અને વેબસાઇટ નથી જોઇ શકતો. કાલે Java Virtual Machine install કર્યા પછી પણ હજી પ્રોબ્લેમ છે. પણ થોડી સળી કર્યા પછી કદાચ થઇ જશે.

કાલે થોડું વેબ પર પણ સર્ચ ચાલુ કર્યું  જેથી કરીને સારી utilities અને application શોધીને મોબાઇલ પર install કરી શકું. આ ફોનનો ઉપયોગ ખાલી ફોન પૂરતો મર્યાદિત ના રાખતા એના દરેક feature ઉપયોગ કરવા છે. પ્રોબ્લેમ જો કે કાંઇ પણ ડાઉનલોડ કરીને એને install કરીને ચલાવવું કેટલું trustworthy છે એ નક્કી કરવું છે. જો કોઇ જેવી તેવી applications ને install કરીએ તો ફોનની વાટ લગાવી નાંખે.

કાલે આ ફોનની ઇન્ડિયામાં કેટલી કિંમત છે એ ચેક કરતો હતો. HTC એ ઇન્ડિયામાં આ ફોનની રિટેઇલ કિંમત 32,990 રૂપિયા રાખી છે. એટલે 30,000થી નીચે તો કદાચ ઇન્ડિયામાં આ ફોન નહીં મળતો હોય એમ લાગે છે. જોઇએ નજીકના ભવિષ્યમાં ફોન સાથે બીજા શું ગતકડાં હું કરું છું…

આજકાલ કશું લખી શકાતું નથી બ્લોગ પર પણ જીંદગીમાં રોજંબરોજ કાંઇક નાની મોટી નવા જૂની ચાલે રાખે છે.

હવે અમે બધા સિંગાપોરના કાયમી રહેવાસી એટલે કે permanent residents બની ગયા છે. અમુક વસ્તુઓ જે કરવા માંગુ છે એ થઇ નથી શકતી એટલે PR લેવાનો નિર્ણય કર્યો. મને દિલથી તો સિંગાપોરમાં રહેવામાં જરા પણ રસ નથી.

થોડા દિવસ પહેલા Smart Phone (HTC Touch Cruise Micro) લીધો. આમ તો આ મોબાઇલની કિંમત 900 - 1000 ડોલર જેટલી છે પણ 2 વર્ષના કોન્ટ્રાક્ટમાં વાઉચર સાથે ખાલી 368 ડોલરમાં પડ્યો. સ્માર્ટ ફોન વાપરવાનો આ પહેલો અનુભવ થયો. જો કે સ્માર્ટ ફોન ખાલી નામના જ સ્માર્ટ છે બાકી User Friendlyness બહુ નથી. જો સ્માર્ટ ફોન વાપરવાનો ચસ્કો હોય તો ઠીક છે બાકી હું કોઇને આ ફોન માટે ભલામણ ના કરું. આ વર્ષના અંત સુધીમાં સિંગાપોરમાં iPhone આવી જશે જોઇએ એ ફોન કેવો છે. આમ તો અમેરિકામાં આ ફોન વાપરનારા લોકો એના વિશે સારો જ અભિપ્રાય આપે છે. નીચે મેં લીધેલા ફોનની તસ્વીર છે. આમ જોઇએ તો મોટો અને વજનદાર ફોન છે. [:)]

જોઇએ આ વખતે યોકોગાવા બોનસ અને ભાવવધારાની કેવી લ્હાણી કરે છે. Appraisalમાં રેટીંગ તો exceed expectation મળ્યું છે પણ આપણને તો કેટલા ડોલરીયા ગજવામાં આવે છે એનાથી મતલબ છે.

ઓક્ટોબર મહિનામાં દિવાળી આવે છે અને ફરી ઇન્ડીયા જવાનું છે. ગયા વખતે કામકાજમાં જ ઇન્ડીયાની ટ્રીપ ક્યારે પૂરી થઇ ગઇ ખબર ના પડી. આ વખતની ટ્રીપમાં થોડી હળવાશ રહે તો સારુ છે.

આજે જીંદગીના 31 વર્ષ પૂરા થયા. લાગે છે કે બહુ ઝડપથી વૃધ્ધત્વ તરફ વધી રહ્યો છું….

કેક તો અહીં સિંગાપોરમાં ખવાય એમ છે નહીં કારણ કે ઇંડા વગરની કેક સિંગાપોરમાં શોધવી એ બહુ કપરુ કાર્ય છે પણ આ સુંદર કેકના ફોટાથી મન મનાવી લઇએ…

થોડાક દિવસ પહેલા હું ટાઉને લઇને કોમ્યુનિટી પાર્કમાં ગયો હતો. ત્યાં અમુક નાના છોકરાઓ બોલ રમી રહ્યા હતા. ટાઉએ પણ ઉછ્ળતા બોલને જોઇને બોલની પાછળ ભાગ મ ભાગ કરવા માંડી પણ એનાથી મોટી ઉમરના છોકરાઓ આગળ ટાઉનો ક્યાંથી ગજ વાગે. ટાઉ બોલ પાછળ દોડે તો પણ એને પકડી ના શકે અને છોકરાઓ બોલ લઇને ભાગી જાય. એટલે એ દિવસે થયું કે ટાઉને બોલ ગમે છે તો એના માટે બોલ લાવી દઇએ.

એટલે ગયા અઠવાડિયે હું ટાઉના રમવા માટે બોલ લઇ આવ્યો. બોલ સાથે ટાઉને રમવાની મઝા આવે છે.  પહેલી વાર બોલ સાથે રમતા ટાઉની વિડીયો નીચે છે.

હવે ટાઉ મહારાજા એમની જાતે જ દૂધની બોટલ પકડીને દૂધ પી લે છે. નીચે દૂધની બોટલ પકડીને ટાઉ સૂતો છે.

મને અને ટાઉને આ ગીત ખૂબ ગમે છે.

છેલ્લા કેટલાક સમયથી એક ચલચિત્ર ખૂબ જ ચર્ચામાં છે અને એ છે “तारे जमीन पर”. આ ચલચિત્ર આમીર ખાન દ્વારા નિર્મિત છે. આમીર ખાન એ કાંઇક અલગ જ માટીનો કલાકાર છે અને એની કામ કરવાની ઢબ અલગ જ છે. આમીર ખાનના અંગત જીવનમાં ભલે ગમે તેવા લોચા હોય પરંતુ એ બોલીવુડમાં સૌથી અદનો કલાકાર છે.

આ ચલચિત્ર એ આજના સમયના એક ખૂબ જ સળગતા સવાલને વાચા આપી છે અને એ છે નાના બાળકો પાસેથી રાખવામાં આવતી અધધધ આશાની. આજકાલનો જમાનો બહુ સ્પર્ધાનો છે. બળિયાના બે ભાગ અને survival of fittest એ આજના જમાનાની કડવી વાસ્તવિકતા છે. આજકાલ દરેક મા બાપ પોતાના બાળકને ડોક્ટર, ઇજનેર કે અન્ય કોઇ ટેકનિકલ લાઇનમાં નાંખવા માંગતા હોય છે પણ મા બાપ એ ભૂલી જતા હોય છે કે દરેક બાળક ડોકટર કે ઇજનેર ના બની શકે. બાળકોની પણ બૌધ્ધિક કે શારિરીક ક્ષમતા હોય છે જેનાથી એ વધારે ના કરી શકતું હોય. વળી બાળકને રસ હોય કે ના હોય એના પર પોતાના સપનાનો બોજ મા બાપ લાદી દેતા હોય છે.  આ બધા કારણોસર મા બાપ અને છોકરા બન્ને પોતાની સામાન્ય જીંદગી નથી જીવી શકતા. છોકરા બિચારા મા બાપની ઇચ્છાઓનો ભાર ના ઉપાડી શકે અને પોતાના રસ પ્રમાણે ના કરી શકે એટલે કાયમ સૂનમૂન રહે અને મા બાપ પોતાનો છોકરો કેમ Super Human નથી એના લીધે અપસેટ રહ્યા કરે.

આજ કાલ છોકરાઓનું બાળપણ તો ભણતરના બોજ તળે અને co carriular activities ના બોજ તળે દબાઇ ગયું છે. મને ઘણી વખત એ વિચાર આવે છે કે અમે જ્યારે નાના હતા ત્યારે કેટલું નીચે ભાઇબંધો મળીને રમતા હતા. જ્યારે આજ કાલ તો છોકરાઓને રમવાનું શું હોય છે એ ખબર જ નથી. છોકરા સ્કૂલથી આવે એટલે એમને ટ્યુશનમાં જવાનું હોય અને ટ્યુશનથી આવે પછી કોઇ સ્કેટીંગ, સ્વિમીંગ વગેરેના ક્લાસમાં મા બાપ જોતરી દે. અને જો કદાચ આ બધાંમાંથી થોડો ટાઇમ મળે તો પણ કાર્ટૂન જોવા ટીવી સામે ગોઠવાઇ જતા હોય છે. ખૂલ્લી જગ્યામાં જઇને રમતો કંઇ રીતે રમાય અને કુદરતી રીતે આનંદ કઇ રીતે પમાય એ તો આજકાલના છોકરાઓને કદાચ ખબર જ નથી. ધરતીના ખોળે રમવાનું સુખ કદાચ આજકાલના બાળકોના નસીબમાં જ નથી.

“तारे जमीन पर” ચલચિત્રના લીધે ઘણાં માબાપની કદાચ આંખ ઉધડી હશે. કદાચ આ ચલચિત્ર દરેકના જીવનને સ્પર્શે છે એટલે જ કદાચ આ ચલચિત્ર આટલું સફળ થયું છે. મા બાપ પોતાના બાળકની ક્ષમતાને જાણે અને બાળકની ઇચ્છા અને ક્ષમતા મુજબ પોતાના સપના સજાવે તો એ વધુ યોગ્ય રહેશે. “મા…” ગીત જે આ મૂવીમાં છે એ ખરેખર અદભૂત છે. બાળકના દિલનો ચિતાર આ ગીતમાં ખૂબ સુંદર રીતે રજૂ કર્યો છે.

ગઇ કાલે ફિલ્મફેર એવોર્ડમાં પણ આ ચલચિત્ર માટે આમીર ખાનને best director નો એવોર્ડ પણ મળ્યો. આમીર ખાનને ખૂબ ખૂબ અભિનંદન.

આજે 26મી જાન્યુઆરી એટલે કે ગણતંત્ર દિવસ છે. આજના દિવસે ભારતનું બંધારણ અમલમાં આવ્યું અને સાચા અર્થમાં લોકશાહીની સ્થાપના થઇ ભારતમાં.

ગણતંત્ર દિવસની પરેડ જે દિલ્હીમાં થાય છે એ જોવાની મઝા આવે પણ અહીં સિંગાપોરમાં એ ટીવી પર પણ ના જોવા મળે. એવી ઇચ્છા છે કે એક દિવસ આ પરેડ લાઇવ જોવી છે દિલ્હીમાં.

ભારત દેશ ઉત્તરોત્તર પ્રગતિ કરતો રહે અને બધાં ભારતીયો ખુશહાલ રહી શકે એવી આ 58માં ગણતંત્રના દિવસે શુભકામના.  

“छोडो कल की बातें, कल की बात पूरानी,

नये दोर में लिख्खें हम मिलकर नइ कहानी,

हम हिन्दुस्तानी, हम हिन्दुस्तानी…. “

એમ કહેવાય છે કે જે થાય છે એ સારા માટે થાય છે. જ્યારે એ વસ્તુ થતી હોય છે ત્યારે કદાચ દરેકને એમ જ લાગતું હોય છે કે આમ શા માટે થયું અને જે થયું એમાં સારુ શું હશે. રિલાયન્સ ઇન્ડસ્ટ્રીઝ લિમીટેડના સંદર્ભમાં મને આ વાત યાદ આવી ગઇ.

આજથી લગભગ 2 - 2.5 વર્ષ પહેલા રિલાયન્સ ઇન્ડસ્ટ્રીઝ લિમીટેડ બે ભાગમાં વહેંચાઇ હતી. મૂકેશભાઇ અને અનિલભાઇના આંતરિક મતભેદોના લીધે રિલાયન્સ ઇન્ડસ્ટ્રીઝ લિમીટેડ બે ભાગમાં વહેંચાઇ ગઇ. ત્યારે લગભગ દરેકને એમ જ લાગતું હતું કે આ બે ભાઇઓ પિતાના દ્રારા ઉભી કરેલી આ વિરાસતને ઉજાડવા બેઠા છે. બે ભાઇઓ અલગ થઇને સફળ થઇ શકશે નહીં એવું લોકો માનતા હતા. પણ આજે લગભગ બે વર્ષ બાદ મૂકેશભાઇ અને અનિલભાઇ બન્ને ભાઇઓએ જનતા જે માનતી હતી તેને ખોટી સાબિત કરી નાંખી. બન્ને ભાઇઓએ અલગ થઇને પોતાપોતાને કમ્પનીઓને ટોચ પર પહોંચાડી દીધી છે. છેલ્લા કેટલાક સમયથી શેરબજારમાં ફૂલગુલાબી તેજી છે અને આ તેજીએ બન્ને ભાઇઓને માલામાલ કરી દીધા છે. મૂકેશભાઇ એક સમયે તો દુનિયાના સૌથી ધનવાન વ્યક્તિ પણ બની ગયા. મૂકેશભાઇના ગ્રુપની કમ્પનીઓનું માર્કેટ કેપ આજે 1 લાખ કરોડથી પણ વધારે છે તો અનિલભાઇ પણ શા માટે પાછળ રહે. અનિલભાઇની ADAG ગ્રુપની કમ્પનીઓ એ છેલ્લા વર્ષમાં રોકાણકારોને સૌથી વધારે માલામાલ બનાવ્યા. છૂટા પડતી વખતે અનિલભાઇના સમૂહની કમ્પનીઓનું માર્કેટ કેપ લગભગ 16,000 કરોડ રૂપિયા હતું જે આજની તારિખમાં લગભગ 1 લાખ કરોડ રૂપિયા જેટલું થઇ ગયું છે. રિલાયન્સ સમૂહની કમ્પનીઓમાં જેણે ધીરજ રાખીને છેલ્લા વર્ષમાં રોકાણ કરી રાખ્યું હશે એમણે નક્કી પોતાના પૈસા એક વર્ષમાં બમણા કરી નાંખ્યા હશે.

રિલાયન્સ ગ્રુપની એક વિશેષતા એ છે કે તેઓને પોતાના ધંધા માટે જ્યારે  રૂપિયાની જરૂર હોય છે ત્યારે તેઓ હંમેશા પબ્લિક પાસે જ જાય છે એટલે કે પબ્લિક ઇસ્યુ બહાર પાડે છે. જો કે જોવા જેવી વાત એ છે કે જ્યારે રિલાયન્સ ગ્રુપની કમ્પની પબ્લિક પાસે જાય છે ત્યારે પબ્લિક પણ ખોબા ભરી ભરીને રૂપિયા આપે છે. અનિલ ગ્રુપ નવી કમ્પની રિલાયન્સ પાવર ચાલુ કરી રહી છે અને દર વખતની જેમ પોતાના નવા સાહસ માટે પબ્લિક ઇસ્યુ અનિલભાઇ માર્કેટમાં લઇને આવ્યા.

રિલાયન્સ પાવરનો પબ્લિક ઇસ્યુ ઘણી રીતે અદ્વિતીય હતો. એક તો આ ઇસ્યુ અત્યાર સુધી ભારતના શેરબજારના ઇતિહાસનો સૌથી મોટો ઇસ્યુ છે. લગભગ 11,200 કરોડ રૂપિયાનો આ પબ્લિક ઇસ્યુ હતો. બીજી વિશેષતા એ હતી કે નાનામાં નાનો માણસ પણ Retail વિભાગમાં શેર માટે અરજી કરી શકે તે માટે Part Paymentની સુવિધા આપી હતી. આના લીધે મહત્તમ ભરણાં માટે 1 લાખ રૂપિયાના બદલે ફક્ત 25,875 રૂપિયા જ અરજી કરતી વખતે ભરવાના હતા. વળી  Retail રોકાણકારોને 20 રૂપિયાનું discount પણ આપવામાં આવ્યું હતું.

રિલાયન્સ પાવરના આ ઇસ્યુને અદભૂત સફળતા મળી. ઇસ્યુ ખૂલતાની સાથે જ ફક્ત 58 સેકન્ડમાં આખો ઇસ્યુ subscribe થઇ ગયો હતો. આખો ઇસ્યુ લગભગ 73 વખત over subscribe થયો અને લગભગ 7.5 લાખ કરોડ રૂપિયા આ ભરણાં થકી જમા થયા હતા.  FII થકી લગભગ 100 બિલીયન ડોલર્સનું રોકાણ કરવામાં આવ્યું હતું જે 14% જેટલું ભારતના વિદેશી મુદ્રાના ભંડાર જેટલું થાય છે. લગભગ 50 મિલીયન જેટલા Retail ઇન્વેસ્ટરોએ આ ભરણાંમાં રોકાણ કર્યું. દુનિયામાં કોઇ પણ લિમીટેડ કમ્પનીની શેર હોલ્ડીંગ પેટર્નમાં 50 મિલીયન Retail શેર હોલ્ડર નથી. ફક્ત આ ભરણાંમાં પૈસા રોકવા માટે જ 10 લાખ જેટલા નવાં demat account લોકોએ ખોલાવ્યાં. ગુજરાતમાં તો આ ભરણાં ને લઇને ખૂબ જ ઉત્સાહ હતો. મહિલાઓમાં પણ આ ભરણાંને લઇને ખૂબ ઉત્સાહ હતો. પોતાના નામે જાતે જ ખાતા ખોલાવવા લાંબી કતારોમાં મહિલાઓ ઉભી રહી હતી. સામાન્ય માણસ કે જેને શેરબજાર શું કહેવાય એ પણ ખબર નથી તેણે પણ આ ભરણાંમાં પોતાના રૂપિયા લગાવ્યા છે. આ ભરણાંથી સામાન્ય પ્રજા કે જેઓએ પહેલી વખત રોકાણ કર્યું છે એમને ખૂબ આશા છે. ઘણાં લોકોએ પોતાની અરજીને 6000 -7000 રૂપિયામાં પણ વેચી નાંખી છે.

અનિલભાઇ અને એમની ટીમ પર લોકોને ખૂબ ભરોસો છે. જોવા જેવી વાત તો એ છે કે રિલાયન્સ પાવર નવી જ કમ્પની છે અને એણે હજી એક પણ રૂપિયાનો નફો નથી કર્યો તો પણ આવો જબરદસ્ત પ્રતિભાવ લોકો તરફથી મળ્યો છે. એ જ બતાવે છે કે લોકોની રિલાયન્સ બ્રાન્ડ પર કેટલો ભરોસો છે. અનિલભાઇએ પણ આ ભરણાંને સુપર ડુપર બનાવવામાં કોઇ કસર નથી છોડી. મુંબઇના ડબ્બાવાળા પાસે લોકોના ટીફીનમાં પોતાના ભરણાંના ફોર્મ મોકલાવવાના કે પછી રિલાયન્સ પાવરની એડના રિંગટોન લોકોના મોબાઇલ પર મોકલાવવાના કે પછી દરેક ટીવી ચેનલ પર રિલાયન્સ પાવરની એડ બતાવવાની જેવા નવતર વિચારો અનિલભાઇએ અપનાવ્યા. અનિલભાઇ આમ તો ધીરુભાઇના જમાનાથી જ રિલાયન્સ માટે પૈસાજ્યારે માર્કેટમાંથી લાવવાના હોય ત્યારે તેના માટે કામ કરતા હતા પણ આજે જ્યારે પોતાની કમ્પની માટે આ કામ કરવાનું આવ્યું ત્યારે આ કામ બખૂબી કરી બતાવ્યું. આશા છે કે કરોડો લોકોની આશા હવે અનિલભાઇ પર છે. અનિલભાઇના કહેવા મુજબ દરેક રોકાણકારને લઘુત્તમ 1 લોટ આપવાનો પ્રયત્ન કરવામાં આવશે. બધાંને આશા છે કે લિસ્ટીંગ ના દિવસે એમને 5000 રૂપિયા તો મળશે જ. મેં પણ અરજી તો કરી છે અને લગભગ 15-16 શેર મળશે એવું લાગે છે. જોઇએ કેટલો નફો થાય છે. [:)]

નીચે રિલાયન્સ પાવરની એડ છે.