PC Show 2010

છેલ્લા 4 દિવસથી PC Show 2010 ચાલી રહ્યો હતો. PC Show એટલે ખાલી કોમ્પ્યુટર માટેનું જ બજાર નહીં પણ SD cardથી માંડીને TV, PC, Washing machine કે કોઇ પણ પ્રકારની ઇલેક્ટ્રોનીક, ગેજેટ અને એને લગતી accessoryનું બજાર. સિંગાપોરમાં વર્ષમાં લગભગ 3-4 વખત આ પ્રકારના showનું આયોજન કરાય છે. લગભગ આખું સિંગાપોર આ showમાં ઉમટી પડે છે. અહીં દરેક પ્રકારની લેટેસ્ટ ઇલેક્ટ્રોનીક વસ્તુઓ થોડા ઘણા સસ્તા ભાવમાં (અથવા બજારભાવે જ વેચાતી હોય તો ઘણી બધી મફત વસ્તુઓ accessoriesમાં) મળી જાય છે. કોઇ પણ પ્રકારની ઇલેક્ટ્રોનીક વસ્તુઓ ખરીદવી હોય તો આ showની રાહ જોવી રહી. સસ્તામાં સારી વસ્તુ મળી જાય.

પરમ દિવસે સાંજે હું પણ આ showની મૂલાકાતે ગયો હતો. મારે તરત જ કંઇ લેવું નહોતું પણ જો કદાચ કોઇ સરસ ડીલ મળે તો બીજું એક નોટબુક લેવાની ઇચ્છા હતી. હવે નોટબુકના ભાવ એકદમ તળિયે આવી ગયા છે. પહેલા જેવું નથી. અત્યારે 800-900 ડોલરમાં ચાલી જાય એવા સારા નોટબુક મળી રહે છે. હવે નોટબુકના બજારમાં Lenovo/Dell/HPની monopoly નથી રહી. Samsung, Acer, Asus, Fujitsu વગેરે જેવા નવા પ્રતિસ્પર્ધીઓ આવી ગયા છે. આજથી 2-3 વર્ષ પહેલા આટલી સ્પર્ધા નહોતી. મેં આજથી 4 વર્ષ પહેલા મારુ Lenovo ThinkPad લીધું હતું 2900 ડોલરમાં પણ હવે latest configurationના Lenovo નોટબુક લગભગ 2200 – 2300 ડોલરમાં મળી રહે છે. જો સ્પર્ધા ના હોત તો હજી પણ Lenovoના latest configurationવાળા નોટબુક 3000 ડોલરમાં વેચાતા હોત. હવે 1500 ડોલરમાં ટકાટક configuration વાળા નોટબુક મળી જાય. મેં સેમસંગનું એક નોટબુક જોયું છે જે 899 ડોલરમાં છે અને સામાન્ય વપરાશકાર માટે એકદમ યોગ્ય નોટબુક છે. હજી આ કે બીજું કોઇ નોટબુક ખરીદવું એનો નિર્ણય નથી લીધો.

હવે નોટબુકની સાથે સાથે નેટબુક પણ આવી ગયા છે. નેટબુક એટલે 10"ની મોનીટર સાઇઝ વાળા ટબૂકડા નોટબુક. અમુક સારા નેટબુક 500 ડોલરમાં જ જોયા. True Value for money I think. જો બહુ ટ્રાવેલ રહેતું હોય અને સામાન્ય કામ સિવાય બહુ ઉપયોગ ના હોય તો આ પ્રકારના નેટબુક લઇ શકાય. નાની મોનીટર સાઇઝ સિવાય બધું સામાન્ય નોટબુક જેવું.

Hard Diskના ભાવ હવે તળિયે આવી ગયા છે. 99 ડોલરમાં(3000 રૂપિયામાં) હવે 500 GB ની Hard Disk મળી જાય છે. 1 TBપણ લગભગ 150 ડોલરમાં મળી જાય છે. ગયા વર્ષે મેં 160 GBની મિડીયા ડીસ્ક લગભગ 150 ડોલરમાં લીધી હતી. ઇલેક્ટ્રોનીક વસ્તુઓ કેટલી જલ્દી outdated થઇ જાય છે અને નવી ટેકનોલોજી કેટલી ઝડપે આવી જાય છે. દર 2-3 મહીને કંઇ ને કંઇ નવું જોવા મળે છે.

હવે 3D TV અને LED TV પણ આવી ગયા છે. અમુક LED TV ની ચિત્રની ગુણવત્તા જોઇને હું દંગ થઇ ગયો. એકદમ crystal clear. હવે LCD TVનો જમાનો ગયો અને આવી ગયો LED TVનો જમાનો. 3D TVનો પણ પહેલી વાર અનૂભવ કર્યો. ચશ્મા પહેરીને ટીવી જોવા બેસવું એ એક અલગ અનૂભવ જેવું લાગ્યું. મને તો ચશ્મા પહેરીને ટીવી જોવા બેસવું એ થોડું લપ જેવું લાગે. આંખોને પણ થાક લાગે. પણ જો સારું 3D મૂવી હોય તો જોવાની મઝા આવે ખરી. સૌથી સારું 3D TV અત્યારે બજારમાં લગભગ 5-6 હજાર ડોલરમાં એટલે કે 1.5 – 2 લાખ રૂપિયામાં મળે છે. બહુ મોંધું કહેવાય. જોઇએ 3D TVને કેવો પ્રતિસાદ મળે છે.

એક કંપનીએ મને આ વખતે શોમાં સૌથી વધુ પ્રભાવિત કર્યો અને એ છે “SAMSUNG”. SAMSUNGએ હવે દરેક પ્રકારની ઇલેક્ટ્રોનીક પ્રોડક્ટમાં પોતાનો પગ પેસારો કરી દીધો છે. નોટબુક, LED TV, LCD TV, મોબાઇલ ફોન, ડિજીટલ કેમેરા અને બીજું ઘણું બધું. SAMSUNG ની ગુણવત્તા મને સારી લાગી. નોટબુક 900 ડોલરમાં ખરેખર સરસ હતું. મારા મિત્રે ST550 કેમેરા પણ ખરીદ્દ્યો. DUAL LCD (both front & back), 12 MP, 5x optical zoom, touch screen and amazing user interface, આ બધું ખાલી 400 ડોલરમાં એટલે કે ખાલી 13000 રૂપિયામાં. (જો કોઇને નવો કેમેરા ખરીદવો હોય તો આ કેમેરાને એક વખત જોઇ લેજો) કેમેરાથી પાડેલા ફોટા પણ જોરદાર લાગ્યા.  SAMSUNGનું પ્રાઇઝીંગ પણ એક્દમ જોરદાર છે. કદાચ નજીકના ભવિષ્યમાં SAMSUNG બીજી કંપનીઓ જેવી કે SONY, LENOVO, NOKIA વગેરેને જબરદસ્ત સ્પર્ધા પૂરી પાડશે એમ લાગે છે. જો કે આ બધામાં ADVANTAGE CUSTOMER.

એકંદરે PC Showમાં મજા આવી. ઘણા વખત પછી outing થયું. બાકી છેલ્લા મહિનાથી તો "आराम हराम है" એ જ જીવનમંત્ર રહ્યો છે. ઉતાવળમાં તો ઉતાવળમાં પણ આજે લગભગ 15-20 દિવસ પછી બ્લોગ પર લખી રહ્યો છું જેનો આનંદ છે. 

2010 : The Future of Productivity

માઇક્રોસોફ્ટ… માઇક્રોસોફ્ટ…. માઇક્રોસોફ્ટ…… સોફ્ટવેરની દુનિયાનું સૌથી મોટું માથું. માઇક્રોસોફ્ટ જે પણ કરે એ શાનથી જ કરે એમાં કોઇ નવાઇ ના હોય. આજકાલ માઇક્રોસોફ્ટ દુનિયાભરમાં પોતાની 2010 સિરીઝની અલગ અલગ પ્રોડક્ટ રિલીઝ માટે કાર્યક્રમો કરી રહી છે. માઇક્રોસોફ્ટ હાલમાં Office 2010, SharePoint 2010, Project 2010, Visio 2010, Visual Studio 2010, SQL Server 2008 R2 રિલીઝ કરી રહ્યું છે. માઇક્રોસોફ્ટની આ નવી પ્રોડક્ટ રેન્જમાં productivity (એટલે કે કાર્યદક્ષતા) પર વધૂ ભાર મૂકવામાં આવ્યો છે.

Future of Prodcutivity

 

જેમ કે માઇક્રોસોફ્ટનો દાવો છે કે Office 2010 વાપરવાથી વાપરનાર વ્યક્તિની કાર્યદક્ષતામાં વધારો થશે અને વપરાશકાર દીઠ દર કલાકે 2 ડોલરનો કંપનીને ફાયદો થશે. ખબર નહીં માઇક્રોસોફ્ટ આવો દાવો કંઇ રીતે કરી શકે છે અને કંઇ રીતે 2 ડોલરના આંકડા પર આવ્યા.   

 

 

 

માઇક્રોસોફ્ટના રિલીઝ પ્રોગ્રામના ભાગરૂપે આજે સિંગાપોરમાં મરીના બે સેન્ડસ રિસોર્ટના કન્વેન્શન સેન્ટર ખાતે ભવ્ય કાર્યક્રમનું આયોજન કર્યું હતું.

image001

IMG_0125

(બાજુનો ફોટો મરીના બે સેન્ડ રીસોર્ટની મુખ્ય ઇમારતનો છે. અહીં રહેવા માટેના રૂમ, શોપિંગ મોલ, ખાવા પીવા માટેની હોટલો અને બીજા આકર્ષણો છે. જો કે હજી ઘણું બધું કામ બાકી છે અને લગભગ એકાદ વર્ષમાં બધું બરાબર શરૂ થઇ જશે. આ ઇમારત 55 માળની છે. આ વિશે વધૂ માહિતી અહીં છે. આ ઇમારત એવી બની છે કે તમે જો અહીંથી પસાર થતા હોવ તો બે ઘડી ઉભા રહીને જોવાનું મન થઇ જાય અને સિંગાપોર વિશે માન થઇ જાય.)

IMG_0119

એપલ અને ગુગલ જેવી કંપનીઓ માઇક્રોસોફ્ટને હવે પૂરેપૂરી સ્પર્ધા આપે છે એટલે હવે માઇક્રોસોફ્ટ માટે આ નવી પ્રોડક્ટોને સફળ બનાવ્યા સિવાય છૂટકો નથી અને એ માટે જોઇએ પૂરતું માર્કેટીંગ. સિંગાપોર ટેકનોલોજીના ક્ષેત્રે દક્ષિણ એશિયાનું હબ સમાન છે અને એટલે જ માઇક્રોસોફ્ટે અહીં મોટો પ્રોગ્રામ રાખવો જરૂરી હતો. માઇક્રોસોફ્ટના CEO સ્ટીવ બાલ્મોર પણ આજે અહીં હાજર હતા. કાર્યક્રમની શરૂઆતમાં એમનું વ્યક્તવ્ય રાખવામાં આવ્યું હતું. સ્ટીવને પહેલી વખત રૂબરૂમાં સાંભળવાની તક મને મળી. એનું વ્યક્તવ્ય સારુ હતું. 54 વર્ષની ઉંમરે બહુ વૃધ્ધ ના કહેવાય તો પણ સ્ટીવની athleticism અને stage presence સારી હતી. એણે ભવિષ્યનો ચિતાર આપતો એક સરસ વિડીયો પણ બતાવ્યો. એના મત મુજબ ભવિષ્યમાં દરેક વસ્તુઓ touch based અને compact થઇ જશે. દરેક device એ smart device હશે અને intelligence સાથે હશે. જેમ આજે મોબાઇલ ફોનનો ઉપયોગ કોમ્પ્યુટર, કેમેરા, કંપાસ વગેરેની જેમ થઇ રહ્યો છે એમ ભવિષ્યમાં મોટા ભાગના device એ multifunctional હશે. વાત એકદમ સાચી છે. ટેકનોલોજી આજે ખૂબ તેજ ગતિએ આગળ વધી રહી છે. Productivity અને Business intelligenc પર ભાર મૂકતા માઇક્રોસોફ્ટથી રૂડું જગતમાં કંઇ નથી એવો સંદેશો સ્ટીવભાઇએ આપ્યો. ત્યારબાદ જુદા જુદા વક્તાઓ દ્વારા વ્યક્તવ્યો હતા જેમાં નવી પ્રોડક્ટમાં આવેલી સુવિધાઓ વિશે વાત કરી હતી.

માઇક્રોસોફ્ટ હાલમાં SharePoint પર પણ બહુ ભાર આપી રહી છે. મોટાભાગના માઇક્રોસોફ્ટના પાર્ટનર કે જેઓ પોતાની પ્રોડક્ટનો પ્રચાર કરી રહ્યા હતા એ Business processના નામે પોતાના SharePoint solution વહેંચી રહ્યા હતા. મને જો કે SharePoint વિશે બહુ ખબર નથી. અમારી કંપનીમાં હાલમાં SharePointનો ઉપયોગ કરી ખાલી Internal portal બનાવેલા છે જે અમે વાપરીએ છીએ. આ સિવાય મને બહુ SharePoint વિશે ખબર નથી. માઇક્રોસોફ્ટ જે રીતે પોતાની પ્રોડક્ટ રેન્જ લાવી રહ્યું છે એ રીતે જોતા મારા જેવા Desktop applicatin developersનું ભવિષ્ય બહુ ઉજ્જ્વળ નથી લાગતું.

નોકિયાએ પણ હવે માઇક્રોસોફ્ટ સાથે પાર્ટનરશીપ કરી છે અને નોકિયાના E સિરીઝના બધાં ફોનમાં હવે Microsoft Exchangeનો સપોર્ટ છે. નોકિયા જો કે હજી પણ સિમ્બીયન ઓપરેટીંગ સિસ્ટમ વાપરે છે અને હજુ સુધી કોઇ windows mobile આવ્યો નથી પણ ભવિષ્યમાં કદાચ આવું કંઇક શક્ય પણ બને. નોકિયા દ્વારા પણ એક સેમિનાર હતો અને એમાં પણ Productivity પર ભાર મૂકાયો હતો. આજ કાલ જમાનો productivity સાથે સાથે multitaskingનો પણ છે. સ્માર્ટફોન કદાચ ભારતમાં હજી 3G સેવાના અભાવના લીધે એટલા ઉપયોગી નથી પણ વિદેશોમાં સ્માર્ટ ફોન વગર જીવન શક્ય નથી એવું લાગે. આજે ઘણું બધું કામ હું મારા આઇફોન પર જ ઓફિસ આવતા જતા કરી લઉ છું. બિઝનેસમાં પણ જો આજ કાલ કોઇ એમ કહે કે હું ઓફિસમાં નથી 2 દિવસ પછી જવાબ આપીશ તો મને એમ જ લાગે કે આ ભાઇને કોઇ રસ નથી. આજે મોબાઇલ ઓફિસનો કોન્સેપ્ટ આવી ગયો છે. એટલા માટે જ માઇક્રોસોફ્ટ Office 2010માં Web Apps આપી રહ્યું છે. તમે તમારો ડેટા ઓન લાઇન રાખી શકો તેમ જ કોઇ પણ જગ્યાએથી મેનેજ પણ કરી શકો. ડેટાની security વિશે થોડી ચિંતા થાય. જો કે આજે એક વાત મને જાણવા મળી કે તમે જો નોકિયાના મોબાઇલ ફોન પર Exchange મેઇલ અને બીજી માહિતી રાખેલી હોય અને જો ફોન ખોવાઇ જાય તો આ ડેટાને remote command થકી દૂર કરી શકાય છે. આમ કરવાથી ડેટા કોઇ ખોટા હાથમાં જવાનો પણ ભય ના રહે. Windows Mobileની પણ નવી ઓપરેટીંગ સિસ્ટમ આવી રહી છે અને સાથે સાથે મોબાઇલ માટે પણ Windows Mobile Office 2010 તો ખરું જ.

જો કે મને માઇક્રોસોફ્ટની જે પ્રોડક્ટ વિશે સૌથી વધારે જાણવાની ઇંતેજારી હતી (Visual Studio 2010) એ વિશે બહુ જાણવા ના મળ્યું. Visual Studio 2010 વિશે વધૂ જાણવા હવે મારે જાતે જ મહેનત કરવી પડશે. કાલે હવે ઓફિસમાં Office 2010 અને Visual Studio 2010 ડાઉનલોડ કરવા પડશે. મારી પાસે MSDN Value subscriberનું લાઇસન્સ છે એટલે બધાં સોફ્ટવેર મફતમાં ડાઉનલોડ કરી શકાય છે એટલે પ્રયત્ન કરવામાં વાંધો નહીં.

મને માઇક્રોસોફ્ટની મોટાભાગની પ્રોડક્ટ સારી લાગી છે (IE આમાં અપવાદ છે.) મફતિયા સોફ્ટવેરો કરતા ગુણવત્તા એકંદરે સારી હોય છે. ખાલી એક જ મોટી સમસ્યા મને કાયમથી નડતી આવી છે અને એ છે performanceની. મોટા ભાગે બધાં પ્રોજેક્ટોમાં development પતી ગયા પછી performance improvementની માથાકૂટ કરવી પડે છે. જો કે માઇક્રોસોફ્ટ દાવો કરે છે કે Office 2010 એ Office 2003 કરતા 90% વધુ ફાસ્ટ છે. જો એમ હોય તો સારુ જ છે. આજે એક વ્યક્તવ્યમાં એવું બતાવવામાં આવ્યું હતું કે Excel sheetમાં 1.5 મિલીયન ડેટા હતા તો પણ sort કરતા ફક્ત 2 સેકંડમાં Data Sort થઇ ગયો. સાચું ખોટું તો વક્તા જ જાણે.

એકંદરે આજનો દિવસ સારો રહ્યો. નવી અમુક બાબતો જાણવા મળી. ઘણી બધી નાની નાની ભેટો મળી. મરીના બે સેન્ડની મૂલાકાત પણ થઇ ગઇ. ખાવા પીવા સાથે મીની જલ્સો થઇ ગયો. બોલો માઇફ્રોસોફ્ટની જય 🙂

P.S. : આ પોસ્ટમાં એટલા બધાં અંગ્રેજી શબ્દો ગુજરાતીમાં ઠપકાર્યા છે કે મને એમ થાય છે કે આના કરતા પોસ્ટ અંગ્રેજીમાં જ લખી હોત તો સારુ હોત. પણ અમુક શબ્દોનું અંગ્રેજીમાંથી ગુજરાતી કરવું મૂશ્કેલ છે જેમ કે સોફ્ટવેરનું ગુજરાતી શું કરવું? કોઇને ખબર હોય તો નીચે કમેન્ટ્માં લખી જણાવજો.

Cool chrome extensions

જ્યારે ગુગલ દ્વારા ક્રોમ વેબ બ્રાઉઝર રજૂ કરાયું હતું ત્યારે મેં ક્રોમ વાપરવાની શરૂઆત કરી હતી પણ એ વખતે ક્રોમમાં ઘણી બધી સુવિધાઓ નહોતી એટલે જ ઇન્ટરનેટ એક્સપ્લોરર કરતા ક્રોમ ઝડપી હોવા છતા પણ થોડા સમય પછી મેં ઇન્ટરનેટ એક્સપ્લોરર ફરીથી વાપરવાની શરૂઆત કરી હતી. ગયા અઠવાડિયે જ્યારે નોટબુક પર મેં વિન્ડોઝ 7 ઇન્સ્ટોલ કર્યું ત્યારે ક્રોમ ફરી એક વખત વાપરી જોવાનું નક્કી કર્યું. હવે ક્રોમમાં અમુક સારી સુવિધાઓ આવી ગઇ છે અને સૌથી સારી વસ્તુ છે Extensions. Extensions એક વખત ઇન્સ્ટોલ કરો એટલે ટુલબારના બટનની જેમ એ બ્રાઉઝરમાં જોઇ શકાય છે. ઘણાં બધાં લોકો દ્વારા બનાવેલા Extensions ડાઉનલોડ કરી શકાય છે પણ અમુક મને જે ગમ્યા એના વિશે થોડું લખું છું.

1. goo.gl URL Shortener
આ Extension થી કોઇ પણ મોટા URL ને નાનું કરી શકાય છે. આ સુવિધા bit.ly અને બીજી વેબસાઇટો થકી મળી રહે છે પણઅહીં સારી વાત એ છે કે Extension ઇન્સ્ટોલ કર્યા પછી જે પણ વેબ પેજ ખૂલેલું હોય એનું URL ખાલી બટન ક્લિક કરવાથી સંક્ષિપ્ત થઇ જાય છે અને સાથે સાથે કોપી કમાન્ડ આપ્યા વગર જ Clip boardમાં સ્ટોર પણ થઇ જાય છે એટલે સીધું બીજે પેસ્ટ પર કરી શકાય છે. સાથે સાથે આ સંક્ષિપ્ત URLને ફેસબુક, ટ્વીટર વગેરે જેવી સાઇટ પર શેર કરવું હોય તો પણ કરી શકાય છે. મને આ બહુ ઉપયોગી લાગ્યું.
2. Google Translate
આ Extension ઇન્સ્ટોલ કર્યા બાદ અંગ્રેજી સિવાય જો કોઇ બીજી ભાષામાં વેબ પેજ જોઇ રહ્યા હોય તો તે આ વેબ પેજને અંગ્રેજી ભાષામાં ભાષાંતર કરી આપે છે. જો કે ભાષાંતર આપોઆપ થઇ જાય એવી પણ વ્યવસ્થા કરી શકાય છે. ઇન્ટરનેટ એક્સપ્લોરરમાં પણ આ પ્રકારની સુવિધા મળી રહે છે.
3. IE Tab
આ Extension મને બહુ ઉપયોગી લાગે છે. અમુક વેબ પેજ માત્ર ઇન્ટરનેટ એક્સપ્લોરર થકી જ બરાબર જોઇ શકાય છે. આવા વેબ પેજ જોવા માટે ક્રોમમાંથી જ ઇન્ટરનેટ એક્સપ્લોરરમાં આ વેબ પેજ ખોલી શકાય છે. જેમ કે શેર પોઇન્ટ પોર્ટલ સાઇટ પર મૂકાયેલી વર્ડ કે બીજી ઓફિસ સોફ્ટવેરની ફાઇલોનું “Check in / Check Out” વગેરે ક્રોમમાંથી કરવું તકલીફવાળુંછે. એટલે શેર પોઇન્ટ પોર્ટલ સાઇટને ઇન્ટરનેટ એક્સપ્લોરર ટેબમાં ખોલીને બધી સુવિધાઓ વાપરી શકાય છે.
4. Panic Button
આ મજાની સુવિધા છે. ઓફિસમાં બેઠા બેઠા TP ચાલતો હોય અને બોસ આવી જાય તો બોસની નજરોમાંથી બ્રાઉઝરને છૂપાવવા માટે બધા ટેબ બંધ કરવાની જરૂર નહીં કે બ્રાઉઝર વિન્ડોને બંધ કરવાની જરૂર નહીં. ખાલી એક બટન દબાવો એટલે બધાં ટેબ ગાયબ અને ફરી આ બટન દબાવો એટલે બધાં ટેબ પાછા હાજર.

લગભગ દરેક Social networking (twitter, facebook), Mail (Gmail), Auction sites (eBay) માટેના Extension પણ ડાઉનલોડ કરી શકાય છે. Extension માટેની ક્રોમની વેબસાઇટ અહીં છે.

હવે ફરીથી ક્રોમ વાપરવાનું શરૂ કર્યું છે જોઇએ આ પ્રેમ ટકી રહે છે કે નહીં.

%d bloggers like this: